Tipos de datos e valores

JavaScript permite traballar con tres tipos de datos primitivos: números, cadeas de texto e valores booleanos. Ademais, JavaScript define dous tipos de datos triviais, null e undefined, cada un deles define un só valor.

JavaScript tamén admite outro tipo de datos composto coñecido como obxecto. Un obxecto representa unha colección de valores (tanto primitivos como outros obxectos). Os obxectos en JavaScript teñen unha natureza dual: poden ser unha colección sen ordenar de valores con nome ou unha colección ordenada de valores numerados. Neste último caso, o obxecto denomínase matriz.

JavaScript tamén define outro tipo especial de obxecto coñecido como función. Unha función é un obxecto que ten un código executable asociado a el. As funcións compórtanse de forma diferente a outros tipos de obxectos.

O núcleo de JavaScript tamén define algúns outros obxectos especializados que representan novas clases de obxectos, por exemplo:

• A clase Date define obxectos que representan a data.
• A clase RegExp define obxectos que representan expresións regulares.
• A clase Error define obxectos que representan erros de sintaxe.

Vexamos os tipos de datos máis polo miúdo:

Números

Os números (number) son o tipo de datos mais básico e requiren moi pouca explicación:

• JavaScript non distingue entre valores enteiros e valores de punto flotante.
• JavaScript representa os números empregando o formato de punto flotante de 64 bits definido polo estándar IEEE 754 (o típico double de Java, C e C++).
• Cando un número aparece directamente nun programa denomínase literal numérico.