Acceder a carpetas compartidas con Windows
Unha vez que temos unha carpeta compartida nun equipo, podemos acceder a ela dende calquera outro equipo da rede local. Imos ver como podemos facelo se o equipo dende o que queremos acceder á carpeta é un equipo Windows. Veremos dúas formas de facelo, accedendo directamente á carpeta ou conectando unha unidade de rede.
Acceder directamente a unha carpeta compartida
Usando o explorador de ficheiros de Windows podemos acceder directamente a unha carpeta compartida noutro equipo da rede local. Esta é unha forma rápida de acceder a unha carpeta compartida, pero non será moi cómoda se imos utilizar con frecuencia a carpeta compartida dende o equipo.
- Acceder directamente a unha carpeta compartida
Abrimos o explorador de ficheiros de Windows (Inicio->Equipo) e escribimos na caixa de dirección a ruta á carpeta compartida á que queremos acceder, que será \\nome_do_equipo_que_comparte_a_carpeta\nome_do_recurso_compartido. Podemos tamén utilizar a dirección IP do equipo en lugar do seu nome, e cómpre recordar que o nome de carpeta que teremos que poñer será o do recurso compartido, que normalmente coincidirá co nome da carpeta, pero non ter por que ser así. Prememos Enter.
Neste momento teremos que autenticarnos no equipo ao que nos estamos conectando, con un nome de usuario e contrasinal que sexan válidos para el. No noso caso, como o usuario wadmin non existe no equipo wserver, se nos pide un nome de usuario e contrasinal para acceder á carpeta.
Xa estamos visualizando o contido da carpeta compartida comun no equipo wserver.
Se temos permiso para facelo, poderemos tamén crear unha nova carpeta picando no botón de Nueva carpeta.
Creamos unha nova carpeta dentro da carpeta compartida.
Podemos ver no equipo wserver como a carpeta foi creada dentro de comun.
Con respecto ao usuario e contrasinal que temos que introducir para acceder á carpeta compartida, cómpre ter en conta que:
- O primeiro que fará o noso equipo é intentar autenticarnos coas mesmas credenciais coas que iniciamos sesión, así que se o usuario co que iniciamos sesión no equipo tamén é válido no equipo ao que nos estamos conectando (e o contrasinal coincide), poderemos acceder á carpeta sen introducir ningunha nova credencial (se neste caso quixéramos conectarnos ao equipo remoto con outro usuario diferente, teremos que facelo conectando unha unidade de rede).
- Poderemos ter problemas se o usuario co que iniciamos sesión tamén é válido no equipo remoto pero non ten establecido contrasinal, xa que Windows bloquea por defecto o acceso ás carpetas compartidas aos usuarios que non teñen contrasinal, e neste caso será preferible conectar unha unidade de rede.
Os seguintes enlaces ofrecen vídeos que mostran como acceder a unha carpeta compartida en Windows XP e Windows Vista:
Conectar unha unidade de rede
A conexión dunha unidade de rede é unha forma máis completa de acceder a unha carpeta compartida, sobre todo no que se refire ao paso das credenciais (nome de usuario e contrasinal) que introducimos para o acceso á carpeta, xa que poderemos indicar en todo caso con que usuario e contrasinal queremos acceder. Ademais, ofrece un acceso máis cómodo á carpeta cando imos acceder a ela con certa frecuencia.
- Conectar unha unidade de rede
No explorador de ficheiros, picamos no botón de Conectar a unidad de red (En Windows 8 atoparemos este botón dentro da pestana de Equipo do explorador de ficheiros).
Windows vai crear unha nova unidade no equipo que enlazará directamente coa carpeta compartida. A esta unidade teremos que asignarlle unha letra (H:, M:, P:, etc.) que non estea sendo usada por ningunha das unidades actuais do equipo. Introduciremos a ruta á carpeta compartida igual que no caso anterior, e teremos a opción de indicar se queremos ou non que Windows conecte a unidade automaticamente cada vez que iniciemos sesión e de conectarnos á carpeta con un usuario e contrasinal diferentes ás que utilizamos para iniciar sesión no equipo. Neste caso deixamos as dúas marcadas, a segunda obrigatoriamente xa que o usuario co que iniciamos sesión (wadmin) non é válido no equipo wserver.
Introducimos o nome de usuario e contrasinal que se usará para autenticarse no equipo ao que nos imos conectar. Se marcamos a opción de Recordar mis credenciales Windows almacenará os datos introducidos e xa non se pedirán de novo cando se volva a conectar automaticamente a carpeta ao iniciar sesión.
Vemos unidade de rede creada no equipo. Entrando nela estamos accedendo á carpeta compartida.
Se queremos desconectar a unidade facemos clic co botón dereito do rato e picamos na opción de Desconectar. Desta forma eliminarase a unidade e xa non se conectará de novo ao iniciar sesión.
Os seguintes enlaces ofrecen vídeos que mostran como conectar unha unidade de rede en Windows XP e Windows Vista: